मोठी बातमी : चाकणमध्ये भटक्या कुत्र्यांच्या हल्ल्यात महिलेचा करुण अंत..!

लोकन्याय मराठी प्रतिनिधी आशिष ढगे पाटील 

चाकण : ​पुणे जिल्ह्यातील चाकण शहरातून एक अत्यंत धक्कादायक आणि थरारक घटना समोर आली आहे. पुणे-नाशिक महामार्गावरील आंबेठाण चौकाजवळ, भटक्या कुत्र्यांच्या एका झुंडीने ३२ वर्षीय महिलेवर हल्ला करून तिला ठार केले आहे. 

कशी घडली घटना..​

• ​मृत महिलेची ओळख: मृत महिलेचे नाव शोभा विजय वाघमारे (वय ३२ वर्षे) असे आहे. त्या मूळच्या देगलूर (जिल्हा नांदेड) येथील असून सध्या चाकण परिसरात राहत होत्या. 

• ​वेळ आणि ठिकाण: ही घटना सोमवार, १६ मार्च २०२६ रोजी मध्यरात्री दोन वाजेच्या सुमारास घडली. शोभा वाघमारे या आंबेठाण चौकाजवळील उड्डाणपुलाखालून सर्व्हिस रोडने जात असताना हा प्रकार घडला. 

• ​हल्ल्याचे स्वरूप: सुमारे सहा हिंसक कुत्र्यांनी एकाच वेळी त्यांच्यावर हल्ला चढवला. सीसीटीव्ही फुटेजमध्ये हा थरार कैद झाला असून, महिलेने प्रतिकार करण्यासाठी दगड उचलून स्वतःचा बचाव करण्याचा प्रयत्न केला, मात्र सहा कुत्र्यांच्या झुंडीपुढे त्यांचा निभाव लागला नाही. 

• ​मृत्यूचे कारण: कुत्र्यांनी त्यांच्या अंगाचे अक्षरशः लचके तोडले आणि कपडे फाडून टाकले. हात, पाय, तोंड आणि मानेवर कुत्र्यांनी गंभीर जखमा केल्या. सुमारे १५ मिनिटे हा थरार सुरू होता. अतिरक्तस्त्राव आणि असह्य वेदनांमुळे शोभा यांचा जागीच मृत्यू झाला.

पोलिस तपास..

सकाळी स्थानिकांना विवस्त्र अवस्थेतील मृतदेह आढळल्यानंतर परिसरात दहशतीचे वातावरण पसरले होते. सुरुवातीला हा अत्याचार किंवा खुनाचा प्रकार असावा अशी चर्चा होती. मात्र, चाकण पोलिसांनी सीसीटीव्ही तपासल्यानंतर हा प्रकार भटक्या कुत्र्यांच्या हल्ल्याचा असल्याचे स्पष्ट झाले. 

​स्थानिकांची भीती..

चाकण आणि परिसरात भटक्या कुत्र्यांची दहशत मोठ्या प्रमाणात वाढली आहे. ही कुत्री केवळ सामान्य कुत्री नसून लांडगा आणि कुत्रा यांच्यातील संकरित प्रजाती असावी, असा संशय व्यक्त केला जात आहे. या घटनेमुळे नागरिक, मुले आणि ज्येष्ठ नागरिकांमध्ये भीतीचे वातावरण आहे.