मोठी बातमी : चाकणमध्ये गॅस तुटवड्यामुळे संतापाचा उद्रेक; नागरिकांकडून पुणे-नाशिक महामार्ग रोखण्याचा प्रयत्न...!

लोकन्याय मराठी प्रतिनिधी आशिष ढगे पाटील 

​चाकण: इराण आणि इस्राईल दरम्यान सुरू असलेल्या युद्धाचे पडसाद आता स्थानिक पातळीवरही उमटू लागले आहेत. या आंतरराष्ट्रीय तणावामुळे जीवनावश्यक वस्तूंच्या पुरवठ्यावर परिणाम झाला असून, चाकण परिसरात घरगुती गॅसचा मोठा तुटवडा जाणवत आहे. तासनतास रांगेत उभे राहूनही गॅस मिळत नसल्याने अखेर संतप्त नागरिकांच्या संयमाचा बांध फुटला आणि त्यांनी पुणे-नाशिक महामार्गावर 'रास्ता रोको' आंदोलन केले.

​गॅस एजन्सीबाहेर लांबच लांब रांगा..

​चाकण परिसरातील भारत गॅस एजन्सीबाहेर गेल्या काही दिवसांपासून गॅस सिलेंडरसाठी ग्राहकांच्या लांबच लांब रांगा लागत आहेत. पहाटेपासून नागरिक रांगेत उभे राहत आहेत, मात्र दिवस संपला तरी रिकाम्या हाताने घरी जावे लागत आहे. गॅस वितरणातील या ढिसाळ नियोजनामुळे सर्वसामान्य गृहिणी आणि नागरिकांमध्ये प्रचंड रोष पाहायला मिळत आहे.

​महामार्ग रोखल्याने पोलिसांची उडाली धांदल..

​गॅस मिळत नसल्याने आक्रमक झालेल्या नागरिकांनी थेट पुणे-नाशिक महामार्गावर धाव घेत रस्ता अडवून धरला. अचानक झालेल्या या आंदोलनामुळे महामार्गावरील वाहतूक पूर्णपणे विस्कळीत झाली. विशेष म्हणजे, चाकण वाहतूक विभाग आणि दक्षिण पोलीस ठाणे हाकेच्या अंतरावर असतानाही हे आंदोलन झाल्याने पोलिसांची मोठी धांदल उडाली. परिस्थिती नियंत्रणात आणण्यासाठी पोलिसांना मोठी कसरत करावी लागली.

​प्रशासनाचा दावा फोल?

​एकीकडे खेड पुरवठा प्रशासन तालुक्यात गॅसचा साठा मुबलक असल्याचा दावा करत आहे, तर दुसरीकडे प्रत्यक्षात नागरिकांना एका सिलेंडरसाठी वणवण करावी लागत आहे. प्रशासनाचा हा दावा आणि जमिनीवरील वस्तुस्थिती यात मोठी तफावत असल्याचे चित्र दिसत आहे.

​"आम्ही कामाधंद्यावर जायचे सोडून गॅससाठी रांगेत उभे आहोत, तरीही गॅस मिळत नाही. प्रशासनाने फक्त आश्वासने न देता प्रत्यक्ष पुरवठा सुरळीत करावा," अशी भावना एका आंदोलक नागरिकाने व्यक्त केली.

-एक आंदोलक 

​गॅस वितरणाचा हा प्रश्न जर येत्या काही दिवसांत मार्गी लागला नाही, तर यापेक्षाही तीव्र आणि भयावह आंदोलन छेडले जाईल, असा इशारा चाकण परिसरातील नागरिकांनी दिला आहे. सध्या महामार्गावरील तणाव निवळला असला तरी गॅसचा प्रश्न अद्याप कायम आहे.