वाघाचा हल्ला.! पत्नीच्या डोळ्यांदेखत पतीला केले ठार... परिसरात प्रचंड दहशत...

प्रतिनिधी - नितीन वरगंटीवार भंडारा

भंडारा जिल्ह्यातील पवनी तालुक्यातून एक काळजाचा थरकाप उडवणारी घटना समोर आली आहे. तालुक्यातील कोदूरली येथील जंगलात झाडणी (झाडूची लाकडे/काड्या) कापण्यासाठी गेलेल्या ५५ वर्षीय इसमावर वाघाने हल्ला करून त्यांना जागीच ठार केले. सर्वात भीषण बाब म्हणजे, हा संपूर्ण थरार मृतकाच्या पत्नीच्या डोळ्यांदेखत घडला. वाघाच्या या हिंस्त्र रूपामुळे संपूर्ण परिसरात सध्या भीतीचे सावट पसरले आहे.

​मिळालेल्या माहितीनुसार, बाबुराव नथू पिल्लेवान (वय ५५ वर्षे, राहणार कोदूरली) असे मृतकाचे नाव आहे. बाबुराव हे आज, २२ मे रोजी आपल्या पत्नीसह गावाशेजारील जंगलात झाडणी कापण्यासाठी गेले होते. दोघेही आपापल्या कामात मग्न असताना, दबा धरून बसलेल्या वाघाने अचानक बाबुराव यांच्यावर झडप घातली.

​वाघाने हल्ला करताच बाबुराव यांनी वाचवण्यासाठी आरडाओरड केली. त्यांच्या पत्नीने पतीला वाघाच्या जबड्यातून सोडवण्यासाठी हिमतीने आरडाओरड केली आणि मदतीसाठी लोकांना आवाज दिला. मात्र, घनदाट जंगल आणि वाघाचा जबर विळखा यामुळे काही वेळातच बाबुराव यांनी जागीच प्राण सोडले. डोळ्यांदेखत पतीला काळाने ओढून नेल्याचे पाहून पत्नीला प्रचंड धक्का बसला.

या घटनेची माहिती मिळताच कोदूरली आणि परिसरातील गावकऱ्यांनी घटनास्थळी धाव घेतली. वनविभागाचे अधिकारी आणि पोलीस दलही तात्काळ दाखल झाले. या घटनेमुळे वनविभागाच्या कार्यक्षमतेवर गावकऱ्यांनी तीव्र संताप व्यक्त केला असून, नरभक्षक वाघाचा तात्काळ बंदोबस्त करावा, अशी मागणी केली जात आहे.