Crime Story || खराबवाडीत हॉटेलच्या ३०० रुपयांच्या बिलावरून मित्रावर कटरने जीवघेणा हल्ला; पोलिसांच्या तत्परतेमुळे टळला मोठा अनर्थ!

लोकन्याय मराठी प्रतिनिधी आशिष ढगे पाटील 

चाकण : खराबवाडी (ता. खेड, जि. पुणे) परिसरामध्ये हॉटेलच्या बिलाच्या क्षुल्लक कारणावरून मित्रावर कटरने प्राणघातक हल्ला केल्याची धक्कादायक घटना उघडकीस आली आहे. मात्र, या घटनेनंतर पोलिसांनी दाखवलेल्या समयसूचकतेमुळे मोठा अनर्थ टळला आहे. पोलीस उपनिरीक्षक संतोष जायभाय आणि पोलीस हवालदार राज हनुमंते यांच्या तत्परतेने जखमीचा जीव वाचला, नाहीतर येथे मोठी दुर्घटना घडली असती. या प्रकरणी दक्षिण महाळुंगे एमआयडीसी पोलीस ठाण्यात आरोपीविरुद्ध गंभीर कलमांखाली गुन्हा दाखल करण्यात आला आहे. 

हॉटेलच्या बिलावरून वाद आणि कटरने वार:

पोलिसांकडून मिळालेल्या माहितीनुसार, १३ ऑक्टोबर रोजी रात्री सुमारे ९:०० वाजण्याच्या सुमारास मौजे खराबवाडी गावच्या हद्दीतील कडवस्ती येथे आशिष श्रीरामे यांच्या किराणा दुकानासमोर ही घटना घडली. फिर्यादी प्रांशु अच्छेलाल रावत (वय १६ वर्षे, मूळ रा. रायपुर, ता. सिगरीया, जि. रिवा, मध्य प्रदेश; सध्या रा. कडवस्ती, खराबवाडी) आणि त्याचा मित्र आरोपी अमर संतोष नायक (वय २१ वर्षे, रा. सहारा सिटी, खराबवाडी, ता. खेड) यांच्यात शिवराही हॉटेलच्या ३०० रुपयांच्या बिलाचे पैसे देण्यावरून वाद झाला. या कारणावरून आरोपी अमर नायक याने फिर्यादीला शिवीगाळ व दमदाटी करत कटरने त्याच्या डाव्या गालावर कानाखाली वार करून गंभीर दुखापत केली.

पोलिसांच्या तत्परतेमुळे वाचले प्राण:

घटनेचे गांभीर्य ओळखून पोलीस उपनिरीक्षक संतोष जायभाय आणि पोलीस हवालदार राज हनुमंते यांनी तात्काळ तत्परता दाखवत मदत कार्य केले. त्यांच्या या तत्परतेमुळे मोठा अनर्थ टळला आणि जखमी तरुणाचे प्राण वाचू शकले; अन्यथा या ठिकाणी आणखी मोठी दुर्घटना घडली असती. पोलिसांच्या या कामगिरीबद्दल समाधान व्यक्त होत आहे.

👆शुभेच्छा बॅनर 👆

​आरोपीवर गुन्हा दाखल:

या प्रकरणी जखमी फिर्यादीच्या तक्रारीवरून दक्षिण महाळुंगे एमआयडीसी पोलिसांनी आरोपी अमर संतोष नायक याच्याविरुद्ध भारतीय न्याय संहिता (BNS) २०२३ चे कलम ११८ (२), ३५१ (२) व ३५२ अन्वये गुन्हा नोंदवला आहे. या प्रकरणाचा पुढील तपास पोलीस करत आहेत.