Political Activity ||खेड पंचायत समितीत सत्तापेच टळला; राष्ट्रवादीच्या माघारीनंतर शिवसेना (उबाठा) ची बिनविरोध बाजी!

लोकन्याय मराठी प्रतिनिधी आशिष ढगे पाटील 

राजगुरूनगर(ता. खेड) :: खेड पंचायत समितीच्या सभापती आणि उपसभापती पदाची निवडणूक सोमवारी अत्यंत नाट्यमय आणि शांततापूर्ण वातावरणात बिनविरोध पार पडली. मागील निवडणुकीत सत्तास्थापनेसाठी झालेल्या अटीतटीच्या संघर्षाच्या पार्श्वभूमीवर यंदाही चुरस निर्माण होण्याची शक्यता वर्तवली जात होती. मात्र, ऐनवेळी राष्ट्रवादी काँग्रेसच्या उमेदवारांनी आपले उमेदवारी अर्ज मागे घेतल्याने राजकीय संघर्षाला पूर्णविराम मिळाला. परिणामी, शिवसेना (उद्धव बाळासाहेब ठाकरे) पक्षाने खेड पंचायत समितीवर आपले निर्विवाद वर्चस्व प्रस्थापित केले आहे.

ऐनवेळी राष्ट्रवादीचे 'एक पाऊल मागे'

पंचायत समिती सभागृहात पार पडलेल्या निवडणूक प्रक्रियेत सुरुवातीला शिवसेना (उबाठा) पक्षाकडून सभापती पदासाठी गौरी चंदन मुऱ्हे, तर उपसभापती पदासाठी दिलीप राजाराम डुबे यांनी अर्ज दाखल केले होते. त्यांना शह देण्यासाठी राष्ट्रवादी काँग्रेस पक्षाच्या वतीने सभापती पदासाठी श्रद्धा दत्तात्रय मांडेकर आणि उपसभापती पदासाठी दिनेश हांडे यांनी अर्ज भरल्याने निवडणूक रंगतदार होणार अशी चिन्हे दिसत होती.

परंतु, छाननी आणि अर्ज माघारीच्या निर्धारित वेळेत राष्ट्रवादी काँग्रेसच्या दोन्ही उमेदवारांनी अनपेक्षितपणे आपली दावेदारी मागे घेतली. त्यामुळे रिंगणात केवळ शिवसेना (उबाठा) चे उमेदवार शिल्लक राहिल्याने निवडणूक निर्णय अधिकाऱ्यांनी गौरी मुऱ्हे यांची सभापतीपदी, तर दिलीप डुबे यांची उपसभापतीपदी बिनविरोध निवड झाल्याची अधिकृत घोषणा केली.

गुलाल आणि फटाक्यांची आतषबाजी..

बिनविरोध निवडीची घोषणा होताच पंचायत समिती परिसरात शिवसेना (उबाठा) च्या कार्यकर्त्यांनी एकच जल्लोष केला. कार्यकर्त्यांनी एकमेकांना पेढे भरवून, गुलालाची उधळण करत आणि फटाक्यांची जोरदार आतषबाजी करत परिसर दणाणून सोडला. नवनिर्वाचित पदाधिकाऱ्यांच्या समर्थनार्थ जोरदार घोषणाबाजी करण्यात आली.

ग्रामीण विकासाला गती देण्याचा निर्धार..

निवडीनंतर प्रतिक्रिया देताना नवनिर्वाचित सभापती गौरी मुऱ्हे आणि उपसभापती दिलीप डुबे यांनी मतदारांचे व पक्षाचे आभार मानले. "तालुक्यातील ग्रामीण भागाच्या सर्वांगीण विकासाला आमचे सर्वोच्च प्राधान्य असेल. नागरिकांच्या पायाभूत सुविधा, रस्ते, पाणी आणि दैनंदिन समस्या सोडवण्यासाठी तसेच शासकीय योजना सर्वसामान्यांपर्यंत पोहोचवण्यासाठी कटिबद्ध राहू," असा विश्वास त्यांनी व्यक्त केला.

प्रमुखांची उपस्थिती...

या निवडणूक प्रक्रियेवेळी माजी सभापती विद्या मोहिते, माजी उपसभापती मंगेश सावंत, पंचायत समिती सदस्य दिलीप ढेरंगे, शंकर कावडे, निखिल थोरवे, श्रद्धा मांडेकर, रुपाली कांबळे, प्रसाद घेणंद, सारिका गोगावले, कविता राक्षे, अश्विनी तरस, दिनेश हांडे, मनीषा हिले यांच्यासह तालुक्यातील विविध पदाधिकारी व कार्यकर्ते मोठ्या संख्येने उपस्थित होते.