Political Update || सहकारातील 'पॉवर गेम' सुरू! पुणे जिल्हा बँकेचा बिगुल वाजला; प्रारूप मतदार यादी जाहीर होताच राजकीय मोर्चेबांधणीला वेग..!

लोकन्याय मराठी विशेष प्रतिनिधी..

पुणे : पुणे जिल्ह्याच्या ग्रामीण अर्थकारणाची आणि राजकारणाची जीवनवाहिनी मानल्या जाणाऱ्या पुणे जिल्हा मध्यवर्ती सहकारी बँकेच्या (पीडीसीसी बँक) आगामी पंचवार्षिक निवडणुकीचा प्रत्यक्ष बिगुल वाजला आहे. २०२६ ते २०३२ या कार्यकाळासाठी संचालक मंडळाच्या निवडणुकीची प्रारूप मतदार यादी आज प्रसिद्ध करण्यात येणार असून, यामुळे जिल्ह्यातील राजकीय वर्तुळात हालचालींना वेग आला आहे. गेल्या दोन महिन्यांपासून विविध विकास संस्थांच्या ठरावांवरून सुरू असलेल्या अंतर्गत घडामोडींना आता कायदेशीर आणि राजकीय संघर्षाचे रूप मिळण्याची चिन्हे आहेत.

जिल्हा सहकारी निवडणूक अधिकारी तथा विभागीय सहनिबंधक दिग्विजय आहेर यांनी या संदर्भातील अधिकृत अधिसूचना जारी केली आहे. संचालक मंडळाचा कार्यकाळ २०२६-२७ ते २०३१-३२ असा राहणार असून, २४ ऑगस्ट ते २२ सप्टेंबर या कालावधीत दाखल झालेल्या विविध संस्थांच्या ठरावांच्या आधारे ही प्रारूप यादी तयार करण्यात आली आहे.

निवडणुकीचे महत्त्वाचे टप्पे व वेळापत्रक..

• प्रारूप मतदार यादी प्रसिद्ध : १५ ऑक्टोबर २०२६

• हरकती व आक्षेप नोंदवण्याची मुदत : १४ ते २३ ऑक्टोबर २०२६ (कार्यालयीन वेळेत)

• प्राप्त हरकतींवर निर्णय : २ नोव्हेंबर २०२६ पर्यंत

• अंतिम मतदार यादी प्रसिद्धी : ५ नोव्हेंबर २०२६

हरकतींसाठी २३ ऑक्टोबरपर्यंत मुदत; पुरावे देणे बंधनकारक...

​प्रारूप मतदार यादीतील मतदारांचे नाव, पत्ता किंवा इतर नोंदींबाबत कोणालाही आक्षेप असल्यास त्यांना २३ ऑक्टोबरपर्यंत लेखी स्वरूपात आक्षेप नोंदवता येणार आहे.

• ​आक्षेप नोंदवताना नाव, संपूर्ण पत्ता, संपर्क क्रमांक आणि ई-मेल आयडी नमूद करणे अनिवार्य आहे.

• ​हरकती केवळ तोंडी चालणार नसून, त्यासोबत सबळ कागदोपत्री पुरावे जोडणे आवश्यक आहे.

• ​सार्वजनिक सुट्ट्यांचे दिवस वगळून, पुणे विभागाच्या विभागीय सहनिबंधक कार्यालयात या हरकती स्वीकारल्या जातील. मुदतीनंतर आलेले आक्षेप विचारात घेतले जाणार नाहीत, असे प्रशासनाने स्पष्ट केले आहे.

प्रारूप मतदार यादी कुठे पाहता येईल?

​मतदार आणि इच्छुकांसाठी ही प्रारूप यादी पुढील ठिकाणी उपलब्ध करून देण्यात आली आहे:

१. विभागीय सहनिबंधक कार्यालय (साखर संकुल, पुणे).

२. ​पीडीसीसी बँकेचे मुख्य कार्यालय (पुणे).

३. ​जिल्हा उपनिबंधक कार्यालय (पुणे शहर व ग्रामीण).

४. ​जिल्ह्यातील सर्व तालुका सहकारी निवडणूक अधिकारी तथा उपनिबंधक कार्यालये.

५. ​सहायक निबंधक (दुग्ध) कार्यालय तसेच राज्य सहकारी निवडणूक प्राधिकरणाचे अधिकृत संकेतस्थळ.

राजकीय विश्लेषण: विरोधकांचा 'प्लॅन ऑफ ॲक्शन' आणि पवारांचा बालेकिल्ला...

​पुणे जिल्हा बँक ही नेहमीच राष्ट्रवादी काँग्रेस आणि विशेषतः पवार घराण्याचा अभेद्य राजकीय बालेकिल्ला राहिली आहे. सहकारी संस्थांचे प्रतिनिधी आणि त्यांच्याकडून आलेले ठराव हेच या बँकेच्या सत्तेची खरी चावी ठरतात.

​गेल्या काही दिवसांपासून सत्ताधारी आणि विरोधक या दोघांनीही प्राथमिक सोसायट्यांच्या ठरावांवर पकड मिळवण्यासाठी मोठी ताकद लावली होती. आता प्रारूप यादी समोर आल्याने कोणत्या गटाचे पारडे जड आहे, याचे प्राथमिक चित्र स्पष्ट झाले आहे. २३ ऑक्टोबरपर्यंत विरोधकांकडून विरोधी ठरावांवर मोठ्या प्रमाणात आक्षेप नोंदवून कायदेशीर पेच निर्माण करण्याची शक्यता वर्तवली जात आहे. त्यामुळे ५ नोव्हेंबरला प्रसिद्ध होणारी अंतिम मतदार यादीच निवडणुकीची प्रत्यक्ष दिशा ठरवणार आहे.