शैक्षणिक || ​"विद्यार्थीदशेत ध्येय, स्वप्ने आणि प्रेमाचा सुंदर समन्वय साधा: डॉ. संजय चाकणे"

लोकन्याय मराठी प्रतिनिधी आशिष ढगे पाटील 

पुणे (खडकी): विद्यार्थीदशेत केवळ पुस्तकी ज्ञानापुरते मर्यादित न राहता ध्येय, स्वप्ने आणि जीवनमूल्यांचा यशस्वी संगम साधणे गरजेचे आहे. जीवनजाणिवेचा भक्कम पाया उभारूनच हळव्या प्रेमात गुंतले पाहिजे, असा मौलिक संदेश खडकी शिक्षण संस्थेचे सहसचिव तथा प्राचार्य डॉ. संजय चाकणे यांनी दिला.

खडकी शिक्षण संस्थेच्या टिकाराम जगन्नाथ कला, वाणिज्य व विज्ञान वरिष्ठ महाविद्यालयाच्या (स्वायत्त) मराठी विभागातर्फे आयोजित 'शब्दसृष्टी' साप्ताहिक भित्तीपत्रक आणि 'सृजन' कवी कट्ट्याच्या उद्घाटन सोहळ्यात ते प्रमुख पाहुणे म्हणून बोलत होते. चराचर सृष्टीतील प्रत्येक घटकावर प्रेम करण्याची संवेदनशीलता प्रत्येकाने जोपासावी, असे आवाहन त्यांनी यावेळी केले.

काव्यमय सादरीकरणाने रंगला कार्यक्रम...

उद्घाटनाच्या निमित्ताने आयोजित 'प्रेमाच्या कवितांचे सादरीकरण' या विशेष सत्रात विद्यार्थ्यांनी उत्स्फूर्त सहभाग नोंदवला. निसर्ग, माणुसकी, जीवनमूल्ये आणि प्रेमभावनांवर आधारित कवितांचे विद्यार्थ्यांनी केलेले प्रभावी सादरीकरण उपस्थितांची दाद मिळवून गेले.

सर्जनशीलतेला हक्काचे व्यासपीठ...

यावेळी मनोगत व्यक्त करताना आयक्यूएसी प्रमुख डॉ. गौरी माटेकर यांनी अशा उपक्रमांमुळे विद्यार्थ्यांच्या कलागुणांना योग्य दिशा मिळत असल्याचे नमूद केले. तर, कला शाखेचे उपप्राचार्य प्रा. जे. डी. नाईक यांनी कविता ही समाजात संस्कार आणि संवेदनशीलता टिकवून ठेवण्याचे प्रभावी माध्यम असल्याचे सांगितले.

कार्यक्रमाच्या यशस्वीतेसाठी वाणिज्य शाखेच्या उपप्राचार्या डॉ. सुचेता दळवी, संगणक विज्ञान शाखेचे उपप्राचार्य प्रा. राजेंद्र लेले यांच्यासह महाविद्यालयातील प्राध्यापक, शिक्षकेतर कर्मचारी आणि विद्यार्थी मोठ्या संख्येने उपस्थित होते. मराठी विभागप्रमुख डॉ. शैलेंद्र काळे यांनी प्रास्ताविकेतून उपक्रमाची पार्श्वभूमी मांडली, तर प्रा. स्वामीराज भिसे (विद्यार्थी कल्याण विभागप्रमुख) यांनी सूत्रसंचालन केले.