मोठी बातमी : ​पुणे-नाशिक महामार्गावर शिरोली फाट्याजवळ भीषण वाहतूक कोंडी; ४ किलोमीटरपर्यंत वाहनांच्या रांगा, प्रवासी हैराण..

लोकन्याय मराठी प्रतिनिधी आशिष ढगे पाटील 

​पुणे/राजगुरुनगर: पुणे-नाशिक महामार्गावर चाकण ते खेड दरम्यान असलेल्या शिरोली फाट्याजवळ आज मोठी वाहतूक कोंडी निर्माण झाली आहे. लग्नसराईचा हंगाम आणि वाढलेली गर्दी यामुळे महामार्गावर वाहनांच्या तब्बल २ ते ४ किलोमीटरपर्यंत लांबच लांब रांगा लागल्या आहेत. भर उन्हात तासनतास अडकून पडल्यामुळे प्रवाशांना मोठा मनस्ताप सहन करावा लागत आहे.

​लग्नांच्या गर्दीमुळे महामार्गावर ताण..

​सध्या लग्नसराईचा जोरदार हंगाम सुरू असल्याने पुणे आणि मुंबईकडून ग्रामीण भागाकडे जाणाऱ्या नागरिकांची संख्या मोठी आहे. खासगी वाहने आणि एसटी बसेसची संख्या वाढल्याने पुणे-नाशिक महामार्गावर वाहतुकीचा प्रचंड ताण निर्माण झाला आहे. विशेषतः चाकण आणि खेडच्या दरम्यान असलेल्या शिरोली फाट्यावर आज दुपारी वाहनांची मोठी कोंडी झाली.

कडक उन्हात प्रवाशांचे हाल...

​राज्यात सध्या उन्हाचा तडाखा वाढला आहे. अशा कडक उन्हात शिरोली फाट्याजवळ अडकलेल्या प्रवाशांचे प्रचंड हाल होत आहेत. लहान मुले, वृद्ध आणि रुग्णवाहिकांनाही या कोंडीचा फटका बसला आहे. जवळपास ४ किलोमीटरपर्यंत वाहने संथ गतीने सरकत असल्याने प्रवाशांमध्ये संतापाचे वातावरण आहे.

​पोलिसांच्या अनुपस्थितीमुळे नागरिक आक्रमक..

​चाकण परिसरात वाहतूक कोंडी ही नित्याचीच समस्या झाली आहे. मात्र, आता राजगुरुनगर परिसरातही वारंवार अशा कोंडीचा सामना करावा लागत आहे. धक्कादायक बाब म्हणजे, इतकी मोठी कोंडी होऊनही घटनास्थळी अद्याप वाहतूक पोलीस पोहोचले नसल्याचा दावा स्थानिक नागरिकांनी केला आहे. पोलिसांच्या अनुपस्थितीमुळे ही कोंडी अधिकच जटील होत चालली आहे.

​पर्यायी मार्गांचा अवलंब करण्याचे आवाहन..

​महामार्गावरील ही परिस्थिती पाहता, तातडीने कामासाठी बाहेर पडणाऱ्या वाहनचालकांनी शिरोली फाटा टाळून शक्य असल्यास पर्यायी मार्गांचा वापर करावा, असे आवाहन स्थानिक रहिवासी आणि प्रवाशांकडून केले जात आहे.