अपघात : लेन ओलांडली अन होत्याचे नव्हते झाले! मंचरमध्ये कार-बसचा भीषण अपघात; पती-पत्नीसह आईचा जागीच मृत्यू..!

लोकन्याय मराठी प्रतिनिधी आशिष ढगे पाटील 

मंचर (आंबेगाव): पुणे-नाशिक महामार्गावरील मंचर येथे आज एक अत्यंत हृदयद्रावक घटना घडली आहे. नाशिकहून पुण्याकडे येत असताना एका खाजगी ट्रॅव्हल्स बस आणि कारची समोरासमोर भीषण धडक झाली. या अपघातात एकाच कुटुंबातील तीन सदस्यांचा जागीच मृत्यू झाला असून, दोन मुले गंभीर जखमी झाली आहेत.

नेमकी घटना काय?

मिळालेल्या माहितीनुसार, मल्लिकार्जुन आंबेगावे हे आपल्या कुटुंबासह नाशिक येथील एक कार्यक्रम आटोपून पिंपरी येथील आपल्या घराकडे कारने परतत होते. मंचर परिसरात आल्यावर चालकाचा कारवरील ताबा सुटला आणि कारने दुभाजक ओलांडून थेट विरुद्ध दिशेने (पुण्याकडून नाशिककडे) जाणाऱ्या खाजगी ट्रॅव्हल्स बसला जोरदार धडक दिली. ही धडक इतकी भीषण होती की कारचा चक्काचूर झाला आणि ती बसच्या खाली घुसली.

या भीषण अपघातात मल्लिकार्जुन आंबेगावे, त्यांच्या पत्नी आरती आंबेगावे आणि आई लता तुपलोंढे यांचा जागीच मृत्यू झाला. सुदैवाने, या अपघातात एक मुलगा आणि एक मुलगी बचावले आहेत, मात्र त्यांची प्रकृती अत्यंत गंभीर असून त्यांच्यावर जवळच्या रुग्णालयात अतिदक्षता विभागात उपचार सुरू आहेत.

परिसरात हळहळ..

नाशिकचा कार्यक्रम आनंदाने आटोपून घराकडे परतणाऱ्या या कुटुंबावर काळाने अशा प्रकारे घाला घातल्याने सर्वत्र हळहळ व्यक्त केली जात आहे. घटनेची माहिती मिळताच स्थानिक पोलिसांनी धाव घेऊन बचावकार्य राबवले आणि महामार्गावरील वाहतूक सुरळीत केली. पोलीस या प्रकरणाचा अधिक तपास करत आहेत.