News Update || पुणे रिंग रोड भूसंपादनावरून खेडमध्ये खळबळ; खालुंब्रे ग्रामस्थांची आक्रमक बैठक, प्रशासनाला दिला इशारा..!

लोकन्याय मराठी प्रतिनिधी आशिष ढगे पाटील 

 राजगुरुनगर : पुणे (पूर्व) चक्राकार मार्ग (रिंग रोड) प्रकल्पाच्या भूसंपादनाबाबत महाराष्ट्र शासनाकडून ९ जून २०२६ रोजी अधिसूचित करण्यात आलेल्या निर्णयामुळे खेड तालुक्यातील मौजे खालुंब्रे येथील शेतकऱ्यांमध्ये मोठी अस्वस्थता पसरली आहे. या पार्श्वभूमीवर, खालुंब्रे येथे बाधितांची एक महत्त्वाची बैठक आयोजित करण्यात आली होती, ज्यामध्ये तब्बल ६२ बाधित उपस्थित होते.

बैठकीत काय झाला निर्णय?

या बैठकीत रिंग रोडसाठी होणाऱ्या जमिनीच्या संपादनाबाबत सविस्तर चर्चा करण्यात आली. आपल्या हक्काच्या जमिनी कवडीमोल किमतीत संपादित केल्या जात असल्याचा आरोप उपस्थित ग्रामस्थांनी केला. शासनाच्या या निर्णयाला तीव्र विरोध दर्शवत, भूसंपादनाच्या प्रक्रियेत पूर्ण पारदर्शकता असावी आणि योग्य मोबदला मिळावा, अशी एकमुखी मागणी यावेळी करण्यात आली. प्रकल्पाच्या नावाखाली शेतकऱ्यांचे नुकसान होऊ देणार नाही, असा पवित्रा बाधितांनी घेतला आहे.

पुढील दिशा काय?

शासनाने महाराष्ट्र महामार्ग अधिनियम, १९५५ च्या कलम १५(२) अंतर्गत ही अधिसूचना प्रसिद्ध केली असून, यावर आक्षेप नोंदवण्यासाठी २१ दिवसांची मुदत दिली आहे. या मुदतीचा वापर करून बाधितांनी आपल्या हरकती आणि सूचना संबंधित भूसंपादन अधिकारी तथा उपविभागीय अधिकारी, खेड यांच्याकडे लेखी स्वरूपात तातडीने सादर करण्याचा निर्णय घेतला आहे. जर मागण्यांकडे दुर्लक्ष झाले, तर तीव्र आंदोलन छेडण्याचा इशाराही बैठकीत देण्यात आला आहे. 

​ही बैठक शांततेत पार पडली असली तरी, भविष्यात हा वाद चिघळण्याची चिन्हे दिसत आहेत.