गायराण कारवाई || खराबवाडीतील गायराण अतिक्रमण व महसूली त्रुटींसंदर्भात मंत्रालयात महत्त्वाची बैठक; महसूल मंत्री चंद्रशेखर बावनकुळे यांनी बोलावले ग्रामस्थांना मुंबईला...!

लोकन्याय मराठी प्रतिनिधी आशिष ढगे पाटील 

पुणे :: खेड तालुक्यातील खराबवाडी गावातील गायराण क्षेत्रावरील अतिक्रमण काढू नये आणि गावातील विविध महसूली त्रुटी दूर कराव्यात, या प्रमुख मागण्यांसाठी खराबवाडी गावातील ग्रामस्थांच्या एका प्रतिनिधी मंडळाने महसूल मंत्री चंद्रशेखर बावनकुळे यांची भेट घेतली. महसूल मंत्री यांच्या पुणे दौऱ्यादरम्यान ग्रामस्थांनी त्यांना सविस्तर निवेदन देत आपली बाजू मांडली.

ग्रामस्थांच्या या निवेदनाची आणि समस्येची गांभीर्याने दखल घेत महसूल मंत्री चंद्रशेखर बावनकुळे यांनी सकारात्मक प्रतिसाद दिला आहे. या प्रकरणावर तोडगा काढण्यासाठी त्यांनी येत्या मंगळवार, दिनांक १८ रोजी मंत्रालयात खराबवाडीच्या ग्रामस्थांसोबत एका विशेष व अधिकृत उच्चस्तरीय बैठकीचे आयोजन केले आहे. गायरान धारक ग्रामस्थांच्या बरोबर राज्य सरकार असून सरकारच्या माध्यमातूनही न्यायालयीन प्रक्रियेसाठी वकिलांची मदत करण्याचीही ग्वाही मंत्री बावनकुळे यांनी ग्रामस्थांना दिली आहे.

​या बैठकीसाठी महसूल विभागाच्या संबंधित वरिष्ठ अधिकाऱ्यांनाही उपस्थित राहण्याचे निर्देश देण्यात आले असून, यामध्ये खराबवाडी गावकऱ्यांच्या समस्यांवर चर्चा करून कायदेशीर व योग्य तो निर्णय घेतला जाण्याची शक्यता आहे. या घडामोडीमुळे खराबवाडी गावातील ग्रामस्थांच्या आशा पल्लवित झाल्या आहेत.

यावेळी या शिष्टमंडळात प्रामुख्याने संदीप सोमवंशी (उपाध्यक्ष, भाजपा पुणे जिल्हा), क्रांती सोमवंशी (माजी उपसभापती, खेड बाजार समिती) आणि अरुण सोमवंशी (संचालक, खेड खरेदी विक्री संघ) हे प्रमुख पदाधिकारी उपस्थित होते. तर गावातील सचिन काळुराम कड, विश्वास विनायक कड, निवृत्ती भिकाजी सोमवंशी, अतुल मच्छिन्द्र कड, गौरव सुनील खराबी, निलेश शिवाजी सातव, सहादु शिवराम साठे, दत्ताराज एकनाथ साठे, अर्जुन सोपान खराबी, राजेंद्र मुकुंदा चौगुले, सचिन श्याम केसवड आणि चंद्रकांत राऊत हे सर्व ग्रामस्थ एकत्रितपणे उपस्थित होते.