ACB ​Action || ‘लाचखोर’ एपीआय गळाला; १० लाखांची मागणी अन् ५ लाखांवर तडजोड!

लोकन्याय मराठी प्रतिनिधी आशिष ढगे पाटील 

चाकण : तक्रार अर्जाची चौकशी निकाली काढण्याच्या मोबदल्यात ५ लाख रुपयांची लाच मागितल्याप्रकरणी चाकण उत्तर पोलीस स्टेशनचे सहाय्यक पोलीस निरीक्षक (API) तानाजी शिवाजी कदम यांच्यावर निगडी पोलीस ठाण्यात गुन्हा दाखल करण्यात आला आहे. या कारवाईमुळे पिंपरी-चिंचवड पोलीस आयुक्तालयात मोठी खळबळ उडाली आहे.

नेमके प्रकरण काय?

तक्रारदार हे पुण्यात जमीन खरेदी-विक्रीचा व्यवसाय करतात. तक्रारदार आणि त्यांच्या मुलाच्या विरोधात चाकण उत्तर पोलीस स्टेशनमध्ये दोन तक्रार अर्ज आले होते. हे दोन्ही अर्ज तानाजी कदम यांच्याकडे चौकशीसाठी होते. हे अर्ज 'दिवाणी स्वरूपाचे' आहेत असे दाखवून ते वरिष्ठ अधिकाऱ्यांना सांगून निकाली काढण्यासाठी कदम यांनी सुरुवातीला १० लाख रुपयांच्या लाचेची मागणी केली होती.

एसीबीच्या पडताळणीत सत्य आले बाहेर..

याबाबत तक्रारदाराने लाचलुचपत प्रतिबंधक विभाग (ACB), पुणे यांच्याकडे धाव घेतली. एसीबीने या तक्रारीची पडताळणी केली असता, तानाजी कदम यांनी तडजोडीअंती ५ लाख रुपयांची लाच मागितल्याचे निष्पन्न झाले. ही लाच दोन टप्प्यांत घेण्याचे ठरले होते—पहिले अडीच लाख रुपये आणि तक्रार अर्ज निकाली काढल्यानंतर उर्वरित अडीच लाख रुपये.

लाच मागितल्याचे सिद्ध झाल्यानंतर, आता लाचलुचपत प्रतिबंधक विभागाच्या तक्रारीनुसार निगडी पोलीस स्टेशनमध्ये तानाजी कदम याच्याविरुद्ध गुन्हा दाखल करण्याची प्रक्रिया पूर्ण करण्यात आली आहे.