Crime Story || ​'साहीलच्या चॅटिंग अन् ब्लॉक नंबरने बळी घेतला; प्रेमभंगामुळे २२ वर्षीय तरुणीची आत्महत्या'..!

लोकन्याय मराठी प्रतिनिधी आशिष ढगे पाटील 

महाळुंगे इंगळे(चाकण) :: पिंपरी-चिंचवड पोलीस आयुक्तालयाच्या हद्दीत एका अत्यंत धक्कादायक घटना उघडकीस आली आहे. प्रियकराच्या संशयास्पद वर्तणुकीमुळे आणि मानसिक त्रासामुळे २२ वर्षीय तरुणीने स्वतःच्या राहत्या घरी गळफास घेऊन आपली जीवनयात्रा संपवली आहे. या प्रकरणी प्रियकरावर आत्महत्येस प्रवृत्त केल्याचा गुन्हा दाखल करण्यात आला आहे.

काय आहे प्रकरण?

मयत तरुणीचे नाव मोनिका रामदास पवार (वय २२) असे असून, ती तुळवे वस्ती, खालुंब्रे गाव (ता. खेड) येथे राहत होती. फिर्यादी आणि मयत तरुणीची आई रोहिणी रामदास पवार यांनी दिलेल्या तक्रारीनुसार, मोनिकाचे साहील शंकर बोत्रे (वय २४, रा. येलवाडी) याच्यासोबत गेल्या एक वर्षापासून प्रेमसंबंध होते. साहील आणि मोनिका लग्न करणार होते, मात्र साहीलचे इतर तरुणींशी चॅटिंग सुरू असल्याचे मोनिकाच्या लक्षात आले.

असा दिला त्रास...

जेव्हा मोनिकाने साहीलला या चॅटिंगबद्दल जाब विचारला, तेव्हा त्याने उडवाउडवीची उत्तरे दिली. इतकेच नाही तर, साहीलने मोनिकाचा मोबाईल नंबर ब्लॉक केला. एवढ्यावरच न थांबता साहीलने आपल्या आईच्या मोबाईलवरूनही मोनिकाचा नंबर ब्लॉक करून तिला संपर्क करण्यापासून रोखले. यामुळे मोनिका प्रचंड तणावाखाली होती. "साहीलने माझे आयुष्य बरबाद केले आहे, मला खूप अस्वस्थ वाटत आहे," असे आपल्या मैत्रिणीला सांगत १५ जुलै रोजी संध्याकाळी ४ ते ६ या वेळेत मोनिकाने ओढणीने गळफास घेऊन आत्महत्या केली.

पोलीस कारवाई..

या प्रकरणी उत्तर महाळुंगे एमआयडीसी पोलीस स्टेशनमध्ये साहील शंकर बोत्रे याच्या विरोधात भारतीय न्याय संहिता (BNS) २०२३ चे कलम १०८ (आत्महत्येस प्रवृत्त करणे) अंतर्गत गुन्हा दाखल करण्यात आला आहे. या गुन्ह्याचा पुढील तपास पोलीस उपनिरीक्षक सचिन महाडिक हे करत आहेत, तर गुन्हा दाखल करण्याच्या प्रक्रियेत पोलीस उपनिरीक्षक अनिस मुल्ला यांनी काम पाहिले आहे.

​प्रियकराच्या या कृत्यामुळे परिसरात संताप व्यक्त केला जात आहे.