मोठी बातमी : ​‘शिक्षण माफियांचा’ नंगानाच! गायत्री इंटरनॅशनल स्कूल आणि सरस्वती स्टोअरचे संगनमत; पालकांची सर्रास लूट.?

लोकन्याय मराठी विशेष प्रतिनिधी 

भोसरी : भोसरीतील जय गणेश साम्राज्य परिसरातील गायत्री इंटरनॅशनल स्कूलने शिक्षणाचे बाजारीकरण करत पालकांच्या खिशावर दरोडा टाकला आहे. सरस्वती डिपार्टमेंटल स्टोअरशी संगनमत करून, शाळेने शालेय साहित्याच्या नावाखाली पालकांची अक्षरशः लूट सुरू केली आहे. एका विद्यार्थ्याच्या साहित्यामागे तब्बल एक हजारापेक्षा जास्त रक्कम जादा आकारून, शाळा प्रशासनाने आपल्या ‘शिक्षण माफिया’ असण्याचा पुरावाच दिला आहे.

शाळेचा खोटारडा कारभार आणि शिक्षिकांची मिलीभगत..

जेव्हा या लूटमारीबाबत मुख्याध्यापकांकडे जाब विचारला, तेव्हा त्यांनी “स्टोअरशी आमचा काहीही संबंध नाही,” अशी उडवाउडवीची उत्तरे देऊन हात झटकले. जर शाळा आणि त्या स्टोअरचा संबंध नाही, तर शाळेच्या शिक्षिका तिथे उपस्थित राहून पुस्तक वाटपात काय करत होत्या? हा प्रश्न आता गंभीर बनला आहे. स्पष्टपणे शाळा आणि स्टोअरची हातमिळवणी असून, पालकांना एकाच दुकानातून साहित्य घेण्यास भाग पाडले जात आहे.

राजकीय ‘दबदबा’ की पालकांची ‘लुबाडणूक’?

स्थानिक नगरसेविकेच्या मालकीची असलेली ही शाळा, राजकीय शक्तीचा गैरवापर करत पालकांवर दबाव टाकत आहे का? असा संतापजनक प्रश्न विचारला जात आहे. “आम्ही पोटाला चिमटा काढून मुलांना शिक्षण देतो, पण ही शाळा आमच्या कष्टाच्या पैशांवर डल्ला मारत आहे,” अशा उदिग्न प्रतिक्रिया पालकांमधून उमटत आहेत.

पालकांचे सवाल: ‘सेवा’ शुल्क की ‘लूट’ शुल्क?

काही जागरूक पालकांनी या फसवणुकीची विचारणा केली असता, शाळा प्रशासनाने ‘वाहतूक खर्च’ आणि ‘वाटप खर्चाच्या’ नावाखाली पालकांना वेठीस धरण्याचे धाडस केले आहे. गोरगरीब पालकांचा वेळ आणि श्रमाचा विचार न करता, ही शाळा मनमानी वसुली करून पालकांना वेड्यात काढत आहे.

शिक्षण विभाग गप्प का?

राजकीय वरदहस्त असल्याने शिक्षण विभाग या प्रकारावर कारवाई करणार की नाही, हे आता पाहणे महत्त्वाचे ठरेल. पालकांनी आता आक्रमक पवित्रा घेतला असून, या शाळा आणि स्टोअरवर त्वरित कायदेशीर कारवाई न झाल्यास आम्ही वरिष्ठ स्तरावर आंदोलनाचा पवित्रा घेऊ, असा इशारा पालकांनी दिला आहे.

शिक्षण व्यवस्थेला काळिमा फासणाऱ्या या शाळा प्रशासनावर आणि संगनमत करणाऱ्या स्टोअरवर आता पिंपरी-चिंचवड महानगरपालिकेचा शिक्षण विभाग काय कारवाई करतो, याकडे संपूर्ण शहराचे लक्ष लागले आहे.