मोठी बातमी : ​'माझं कुणी वाकडं करू शकत नाही' म्हणणाऱ्या मुजोर प्रमोद ढमढेरेवर गुन्हा दाखल; सोसायटीत दहशत पसरवणाऱ्यावर आता होणार कायदेशीर कारवाई?

लोकन्याय मराठी प्रतिनिधी आशिष ढगे पाटील 

चाकण : सहकारी गृहनिर्माण संस्थेच्या नियमांचे पालन करण्याऐवजी स्वतःची मुजोरी दाखवणाऱ्या प्रमोद अर्जुन ढमढेरे याच्यावर अखेर दक्षिण महाळुंगे पोलीस ठाण्यात गुन्हा दाखल करण्यात आला आहे. 'माझं कुणी वाकडं करू शकत नाही' अशा अविर्भावात सोसायटीच्या पदाधिकाऱ्यांना आणि सदस्यांना वारंवार दमदाटी करणाऱ्या ढमढेरेच्या या कृत्यामुळे परिसरात संताप व्यक्त केला जात आहे.

ऑडिओ रेकॉर्डिंगमधून मुजोरीचे दर्शन..

या घटनेत धक्कादायक बाब म्हणजे, प्रमोद ढमढेरे आणि सोसायटीचे प्रामाणिक सचिव यांच्यातील संभाषणाचे ऑडिओ रेकॉर्डिंग 'लोकन्याय मराठी'च्या हाती लागले आहे. या ऑडिओ क्लिपमध्ये ढमढेरे अत्यंत असभ्य आणि खालच्या भाषेत सचिवांशी बोलत असल्याचे स्पष्टपणे ऐकू येत आहे. यावरून ढमढेरेची प्रवृत्ती आणि त्याची दहशत निर्माण करण्याची पद्धत चव्हाट्यावर आली आहे.

नेमके प्रकरण काय?

'सारा सिटी फेज डी सहकारी गृहनिर्माण संस्थे'च्या प्रशासकीय कामकाजासाठी केवळ एका सदस्याचा मोबाईल क्रमांक अधिकृत व्हॉट्सॲप ग्रुपवर ठेवण्याचा निर्णय घेण्यात आला होता. मात्र, या निर्णयाचा राग मनात धरून प्रमोद ढमढेरे याने सोसायटीचे सचिव यांना फोन करून, "ग्रुपवर पुन्हा ॲड केले नाही तर परिणाम वाईट होतील," अशी धमकी दिली.

ढमढेरेची मुजोरीची मालिका सुरूच...

प्रमोद ढमढेरे याच्याकडून सोसायटीतील सदस्यांना आणि कमिटीच्या सदस्यांना लक्ष्य करण्याचे प्रकार नवीन नाहीत. यापूर्वीही त्याने अनेकदा व्हॉट्सॲप ग्रुपवर वाद घालून आणि गैरवर्तन करून वातावरण दूषित करण्याचा प्रयत्न केला आहे. सोसायटीचा व्हॉट्सॲप ग्रुप हा केवळ माहिती आणि सूचना देण्यासाठी असूनही, नियमांना धाब्यावर बसवून ढमढेरेने आपली दहशत निर्माण करण्याचा प्रयत्न चालवला आहे.

पोलीस कारवाईकडे सर्वांचे लक्ष..

सोसायटीचे सचिव यांनी याप्रकरणी दिलेल्या तक्रार अर्जानुसार, ढमढेरेच्या या वर्तनामुळे पदाधिकाऱ्यांच्या मनात भीतीचे वातावरण निर्माण झाले आहे. या प्रकाराची गंभीर दखल घेत पोलिसांनी गुन्हा दाखल केला असून, आता या मगरूर ढमढेरेवर पोलीस नेमकी काय कारवाई करतात, याकडे सर्वांचे लक्ष लागले आहे. अशा मुजोर प्रवृत्तींना वेळीच चाप न लावल्यास भविष्यात मोठे संकट ओढवू शकते, अशी चर्चा आता सोसायटीतील रहिवाशांमध्ये रंगली आहे.