सानगडी येथील पेट्रोल पंप कर्मचारी वैभव बांगरे ह्याची उर्मट वागणूक.! ग्राहकांशी सतत गैरवर्तन - नागरिकांमध्ये तीव्र संताप...

 प्रतिनिधी || साहिल रामटेके, भंडारा

भंडारा जिल्ह्यातील साकोली तालुक्यातील अशोका पेट्रोलियम पंपावर काम करणाऱ्या एका कर्मचाऱ्याच्या उर्मट व गैरवर्तनामुळे नागरिकांमध्ये तीव्र नाराजी व संतापाचे वातावरण निर्माण झाले आहे. पेट्रोल भरण्यासाठी येणाऱ्या ग्राहकांशी अपमानास्पद वागणूक दिली जात असल्याच्या तक्रारी वारंवार समोर येत आहेत.

मिळालेल्या माहितीनुसार, वैभव बांगरे (वय २९, रा. सासरा, ता. साकोली, जि. भंडारा) हा युवक अशोका पेट्रोलियम पंपावर कर्मचारी म्हणून कार्यरत आहे. मात्र, तो पेट्रोल भरण्यासाठी येणाऱ्या नागरिकांशी सतत उर्मटपणे बोलणे, अपमानास्पद शब्दांचा वापर करणे, तसेच किरकोळ कारणांवरून वाद घालणे अशा प्रकारचे वर्तन करत असल्याचा गंभीर आरोप स्थानिक नागरिकांनी केला आहे.

ग्राहकांच्या म्हणण्यानुसार, पेट्रोल भरण्यासाठी साध्या सेवेसाठी आलेल्या लोकांना योग्य वागणूक देण्याऐवजी संबंधित कर्मचारी अनेकदा उद्धटपणे प्रतिसाद देतो. त्यामुळे अनेक नागरिकांना मनस्ताप सहन करावा लागत असून, पंप परिसरात तणावाचे वातावरण निर्माण होत असल्याचेही समोर आले आहे.

विशेष म्हणजे, पेट्रोल पंप प्रशासनाकडून कर्मचाऱ्यांना सातत्याने ग्राहकांशी नम्र, शिस्तबद्ध व सौजन्यपूर्ण वर्तन करण्याच्या स्पष्ट सूचना दिल्या जात असल्याचे सांगितले जाते. तरीदेखील संबंधित कर्मचारी या सूचनांकडे दुर्लक्ष करून आपली मनमानी व मुजोरी सुरू ठेवत असल्याचे नागरिकांचे म्हणणे आहे.

गेल्या काही दिवसांपासून या कर्मचाऱ्याविरोधात अनेक तक्रारी पुढे आल्या असून, स्थानिक नागरिकांनी त्याच्या वर्तनाबाबत तीव्र नाराजी व्यक्त केली आहे. “ग्राहकांशी अशा प्रकारे अपमानास्पद वागणूक खपवून घेतली जाणार नाही,” असा सूर नागरिकांमध्ये उमटत आहे.

या प्रकारामुळे “ग्राहक देवो भव” या संकल्पनेला तडा जात असल्याची भावना व्यक्त केली जात आहे. अत्यावश्यक सेवेत काम करत असतानाही अशा प्रकारची वागणूक देणे गंभीर बाब मानली जात आहे.

दरम्यान, नागरिकांनी संबंधित कर्मचाऱ्यावर तात्काळ कठोर शिस्तभंगात्मक कारवाई करण्याची मागणी केली असून, अशा प्रकारची मुजोरी भविष्यात पुन्हा घडू नये यासाठी ठोस पावले उचलावीत, अशीही मागणी होत आहे.