Murder Update || "शेलूगावात रक्ताचा सडा! पतीकडून पत्नीची हत्या, आत्महत्येने संपला संसार; पोलिसांकडून तपास सुरू."

लोकन्याय मराठी प्रतिनिधी आशिष ढगे पाटील 

वासुली : उत्तर महाळुंगे पोलीस ठाण्याच्या हद्दीतील शेलूगाव येथील ठाकरवस्ती येथे एका भीषण घटनेने संपूर्ण परिसरात खळबळ उडाली आहे. पती-पत्नीमध्ये झालेल्या वादातून पतीने आपल्या ३० वर्षीय पत्नीची हत्या करून, त्यानंतर स्वतः गळफास घेऊन आत्महत्या केल्याची धक्कादायक घटना समोर आली आहे.

नेमकी घटना काय?

मिळालेल्या माहितीनुसार, दिनांक १६/०६/२०२६ रोजी सायंकाळी ५:०० वाजल्यापासून ते १७/०६/२०२६ रोजी सकाळच्या दरम्यान ही घटना घडली. शेलूगाव (ठाकरवस्ती) येथे पिनाबाई रामदास केदारी (वय ३० वर्षे) या महिलेची तिचा पती नवनाथ खेमा केदारी याने हत्या केली. आपल्या पत्नीला जीवे मारल्यानंतर, नवनाथ केदारी याने देखील राहत्या घरी गळफास घेऊन आपली जीवनयात्रा संपवली.

उत्तर महाळुंगे पोलिसांची धडाकेबाज कामगिरी..

या घटनेची माहिती मिळताच उत्तर महाळुंगे पोलीस ठाण्याचे पथक तातडीने घटनास्थळी दाखल झाले. पोलिसांनी अत्यंत गांभीर्याने या प्रकरणाचा तपास सुरू केला असून, घटनास्थळाची पाहणी करण्यासाठी फॉरेन्सिक टीमला पाचारण करण्यात आले होते. फॉरेन्सिक टीमने घटनास्थळावरून दोन खडे आणि एक गिलवर यांसारखे महत्त्वाचे पुरावे जप्त केले आहेत.

​या दुहेरी दुर्दैवी घटनेप्रकरणी पोलीस उपनिरीक्षक सचिन महाडिक यांच्या मार्गदर्शनाखाली पुढील तपास सुरू आहे. पती-पत्नीमध्ये नेमका असा कोणता वाद होता, ज्यामुळे हे टोकाचे पाऊल उचलले गेले, याचे गूढ उकलण्यासाठी पोलीस कसून तपास करत आहेत.