क्राईम : मोहितेवाडीत 'भाईगिरी'चा प्रयत्न फसला! चार धारदार शस्त्रांसह सराईत गुन्हेगार चाकण पोलिसांच्या जाळ्यात..! 

लोकन्याय मराठी प्रतिनिधी आशिष ढगे पाटील 

​चाकण (पुणे): शाळा परिसरात दहशत माजवण्याच्या उद्देशाने किंवा मोठ्या गुन्ह्याच्या तयारीत असलेल्या एका इसमाला चाकण पोलिसांनी अत्यंत धाडसी कारवाई करत बेड्या ठोकल्या आहेत. आरोपीकडून दोन तलवारी आणि दोन सुरा अशी एकूण चार धारदार शस्त्रे जप्त करण्यात आली असून, या कारवाईमुळे परिसरात खळबळ उडाली आहे.

नेमकी घटना काय?

​दिनांक २८ मार्च २०२६ रोजी, चाकण पोलीस ठाण्याचे पथक गुन्हे प्रतिबंधक पेट्रोलिंग करत असताना त्यांना गुप्त बातमीदाराकडून खात्रीशीर माहिती मिळाली. मोहितेवाडी (ता. खेड) येथील जिल्हा परिषद प्राथमिक शाळेसमोरील मोकळ्या जागेत एक व्यक्ती संशयास्पदरीत्या थांबली असून त्याच्याकडे घातक शस्त्रे असल्याची माहिती पोलिसांना मिळाली होती.

​पोलिसांचा 'सापळा' आणि अटक..

​माहिती मिळताच पोलिसांनी वेळ न घालवता घटनास्थळी धाव घेतली आणि परिसराची नाकेबंदी करून सापळा रचला. संशयित इसमाला ताब्यात घेऊन पंचांसमक्ष त्याची झडती घेतली असता, पोलिसांनाही धक्का बसला. त्याच्याकडे २ लोखंडी तलवारी आणि २ लोखंडी सुरा असा एकूण २,८०० रुपये किमतीचा मुद्देमाल बेकायदेशीररीत्या मिळून आला.

​आरोपीची ओळख..

​अटक करण्यात आलेल्या आरोपीचे नाव शरद परशुराम पोतले (वय ४४ वर्षे, रा. मोहितेवाडी, ता. खेड, जि. पुणे) असे आहे. त्याच्याविरुद्ध चाकण पोलीस ठाण्यात भारतीय शस्त्र कायदा कलम ४/२५ सह महाराष्ट्र पोलीस अधिनियम कलम ३७(१)(३) अन्वये गुन्हा दाखल करण्यात आला आहे.

या पथकाने बजावली कामगिरी..

​सदरची कारवाई चाकण उत्तर पोलीस स्टेशनचे वरिष्ठ पोलीस निरीक्षक जितेंद्र कदम यांच्या मार्गदर्शनाखाली पार पडली. यामध्ये:

• ​पोलीस उपनिरीक्षक: चंद्रशेखर मोरखंडे

• ​पोलीस हवालदार: भैरोबा यादव, योगेश कोळेकर, प्रीतम ढमढेरे

• ​पोलीस अंमलदार: महेश कोळी, शिवाजी लोखंडे, सुमीत जगझाप, रमेश कांबळे, संतोष फटांगरे यांनी विशेष परिश्रम घेतले.

​या प्रकरणाचा पुढील तपास पोलीस हवालदार कोळेकर करत आहेत. शाळेसारख्या सार्वजनिक ठिकाणी अशा प्रकारे शस्त्रे घेऊन वावरणाऱ्या आरोपीला अटक केल्यामुळे पालकांनी आणि स्थानिक नागरिकांनी पोलिसांचे आभार मानले आहेत.