Girl Suicide Death || लग्नाचे आमिष दाखवून फसवणूक; पुण्यात प्रियकराच्या जाचाला कंटाळून तरुणीची आत्महत्या..!

लोकन्याय मराठी प्रतिनिधी आशिष ढगे पाटील 

​चाकण : प्रेमात झालेली फसवणूक आणि प्रियकराकडून मिळालेला लग्नाचा नकार या धक्क्यातून एका तरुणीने आपले जीवन संपवल्याची हृदयद्रावक घटना पुणे जिल्ह्यातील चाकण परिसरात घडली आहे. 'तिने प्रेम केलं, पण त्याने केवळ टाईमपास केला' या भावनेतून आणि प्रियकराने दिलेल्या मानसिक त्रासाला कंटाळून या तरुणीने टोकाचे पाऊल उचलले.

​नेमकी घटना काय?

​मूळची नागपूर जिल्ह्यातील सावनेर तालुक्यातील असलेली पूजा मेश्राम ही तरुणी कामाच्या निमित्ताने चाकण परिसरात वास्तव्यास होती. ती एका खाजगी कंपनीत नोकरी करत होती. सोशल मीडियाच्या माध्यमातून तिची ओळख दिल्लीतील करण टोंगारिया (रा. करोलबाग, नवी दिल्ली) याच्याशी झाली. या ओळखीचे रूपांतर पुढे प्रेमात झाले आणि गेल्या काही काळापासून त्यांच्यात प्रेमसंबंध होते.

​मानसिक छळ आणि फसवणूक..

​मिळालेल्या माहितीनुसार, करणने सुरुवातीला पूजेला लग्नाचे आमिष दाखवले होते. मात्र, जेव्हा पूजेने त्याच्याकडे लग्नासाठी विचारणा केली, तेव्हा करणने तिला स्पष्ट नकार दिला. केवळ नकारच दिला नाही, तर त्याने तिला "हा केवळ टाईमपास होता" असे म्हणून तिचा प्रचंड मानसिक छळ करण्यास सुरुवात केली.

​तरुणीने संपवले जीवन..

​प्रियकराकडून सतत होणारा मानसिक त्रास आणि आपली फसवणूक झाल्याच्या जाणीवेने पूजा खचून गेली होती. अखेर या त्रासाला कंटाळून तिने आपल्या राहत्या घरी गळफास घेऊन आत्महत्या केली. या घटनेमुळे परिसरात मोठी खळबळ उडाली असून हळहळ व्यक्त केली जात आहे.

पोलिस कारवाई..

​याप्रकरणी पूजेच्या भावाने चाकण पोलिस ठाण्यात तक्रार दाखल केली आहे. या फिर्यादीवरून पोलिसांनी प्रियकर करण टोंगारिया याच्या विरुद्ध आत्महत्येस प्रवृत्त केल्याचा गुन्हा दाखल केला आहे. चाकण पोलिस या प्रकरणाचा अधिक तपास करत असून आरोपीचा शोध सुरू आहे.