Murder Story || ​"पुण्यात खून, बीडमध्ये विल्हेवाट! चिमुरड्या आवेजच्या खुनाचं 'कुरुळी टू धर्मापुरी' कनेक्शन उघड"

लोकन्याय मराठी प्रतिनिधी आशिष ढगे पाटील 

​पुणे : एका मातेने आपल्या पोटच्या ६ वर्षांच्या मुलाचा प्रियकराच्या मदतीने निर्घृण खून केल्याची धक्कादायक घटना समोर आली आहे. प्रेमसंबंधात अडथळा ठरत असल्याच्या रागातून चिमुरड्याचा जीव घेऊन त्याचा मृतदेह हृदयविकाराचा झटका आल्याचे सांगून विल्हेवाट लावण्याचा प्रयत्न करणाऱ्या या निष्ठुर मातेचा आणि तिच्या प्रियकराचा पर्दाफाश पोलिसांनी केला आहे.

​नेमकी घटना काय?

​मिळालेल्या माहितीनुसार, पुण्यातील खेड तालुक्यातील कुरुळी येथे ही घटना घडली. आरोपी महिला बसरिन मेहबूब शेख (वय २७) हिचे आरोपी राम विनायक कजेवाड याच्याशी प्रेमसंबंध होते. या प्रेमसंबंधात तिचा ६ वर्षांचा मुलगा आवेज मेहबूब शेख हा अडथळा ठरत होता. याच कारणावरून दि. ०४ एप्रिल २०२६ रोजी रात्री २३:३० च्या सुमारास या दोघांनी संगनमत करून आवेजला बाथरुममधील पाण्याच्या बादलीत डोके बुडवून आणि त्याचे डोके भिंतीवर व जमिनीवर आपटून त्याची अत्यंत क्रूरपणे हत्या केली.

​पुराव्यांची विल्हेवाट लावण्यासाठी रचला बनाव..

​हत्येनंतर गुन्हा लपवण्यासाठी आरोपींनी या घटनेला नैसर्गिक मृत्यूचे स्वरूप देण्याचा प्रयत्न केला. आरोपींनी आवेजचा मृतदेह अर्टिगा गाडीतून धर्मापुरी (ता. परळी, जि. बीड) येथे नेला. तेथे नातेवाईकांना आवेजचा मृत्यू हृदयविकाराच्या झटक्याने झाला असल्याचा खोटा बनाव सांगितला. मात्र, फिर्यादी इसाक अहमद शेख (वय ४९) यांना संशय आल्याने त्यांनी तात्काळ परळी ग्रामीण पोलीस ठाण्यात धाव घेतली.

पोलिसी खाक्या दाखवताच फुटले गुपित...

घटनेचे गांभीर्य ओळखून पोलिसांनी तपास सुरू केला. शवविच्छेदन अहवाल आणि संशयास्पद हालचालींमुळे पोलिसांनी आरोपी महिला बसरिन शेख हिची कसून चौकशी केली. सुरुवातीला उडवाउडवीची उत्तरे देणाऱ्या बसरिनने पोलिसी खाक्या दाखवताच आपला गुन्हा कबूल केला आणि या थरारक हत्याकांडाचा उलगडा झाला.

​पोलिस कारवाई...

या प्रकरणी दक्षिण म्हाळुंगे पोलीस ठाण्यात भारतीय न्याय संहिता २०२३ च्या कलम १०३(१), २३८, ६१(२) आणि ३(५) नुसार गुन्हा दाखल करण्यात आला आहे. आरोपी महिला बसरिन शेख हिला अटक करण्यात आली असून तिचा प्रियकर राम कजेवाड याचा पोलीस शोध घेत आहेत.

या प्रकरणाचा पुढील तपास तपास अधिकारी पोलीस उपनिरीक्षक संतोष जायभाय हे अत्यंत बारकाईने करत आहेत.

पुणे आणि बीड जिल्ह्यात या घटनेमुळे मोठी खळबळ उडाली असून, प्रेमसंबंधासाठी एका मातेने आपल्याच रक्ताच्या नात्याचा बळी घेतल्याने संताप व्यक्त केला जात आहे.