खेडमध्ये खळबळ: जैदवाडीत बेपत्ता तरुणाचा निर्घृण खून; तीन दिवसांनंतर कुजलेल्या अवस्थेत मृतदेह सापडला...!

लोकन्याय मराठी प्रतिनिधी आशिष ढगे पाटील 

​खेड (पुणे): खेड तालुक्यातील जैदवाडी गावच्या हद्दीत एका ३३ वर्षीय तरुणाचा धारदार शस्त्राने वार करून खून केल्याची धक्कादायक घटना उघडकीस आली आहे. गेल्या तीन दिवसांपासून बेपत्ता असलेल्या या तरुणाचा मृतदेह कुजलेल्या अवस्थेत आढळून आल्याने परिसरात प्रचंड खळबळ उडाली आहे.

​धनंजय मारुती घेवडे (वय ३३, मूळ रा. कारेगाव, ता. आंबेगाव; सध्या रा. राक्षेवाडी) असे मृत तरुणाचे नाव आहे. बुधवारी (दि. १८) सकाळी ११ वाजण्याच्या सुमारास ही घटना उघडकीस आली.

​नेमकी घटना काय?

​मिळालेल्या माहितीनुसार, धनंजय घेवडे हे १६ मार्च रोजी रात्री ९ वाजेपासून बेपत्ता होते. कुटुंबीय त्यांचा शोध घेत असतानाच, बुधवारी सकाळी जैदवाडी परिसरात एका निर्जन स्थळी त्यांचा मृतदेह आढळून आला. मृतदेहाच्या डोक्यावर आणि तोंडावर धारदार शस्त्राने चार खोल वार करण्यात आले असून, रक्ताच्या थारोळ्यात पडलेला मृतदेह पूर्णपणे कुजलेल्या अवस्थेत होता.

​नियोजनबद्ध हत्येचा संशय..

​घटनास्थळी धनंजय यांची दुचाकीही मिळून आली आहे. ज्या क्रूरतेने हा हल्ला करण्यात आला आहे, त्यावरून हा खून अत्यंत नियोजनपूर्वक आणि रागाच्या भरात केला असावा, असा प्राथमिक अंदाज पोलिसांनी व्यक्त केला आहे.

​पोलीस तपास सुरू..

​या घटनेची माहिती मिळताच खेड पोलिसांनी तातडीने घटनास्थळी धाव घेत पंचनामा केला. याप्रकरणी खेड पोलीस ठाण्यात अज्ञातांविरुद्ध खुनाचा गुन्हा दाखल करण्यात आला आहे.

• ​तपासाचे आव्हान: अद्याप हत्येचे नेमके कारण आणि आरोपींचा सुगावा लागलेला नाही. पोलिसांनी तपासाची चक्रे वेगाने फिरवली असून संशयितांची चौकशी सुरू केली आहे.

​या घटनेमुळे जैदवाडी आणि परिसरात भीतीचे वातावरण पसरले असून, गुन्हेगारांना लवकरात लवकर अटक करण्याची मागणी स्थानिक नागरिकांकडून केली जात आहे.