Theft of Gold Jewelry || ओळखीच्या 'मैत्रिणीचा' डाव, बनावट चावीने १० तोळ्यांवर मारला ताव; दक्षिण महाळुंगे पोलिसांनी २४ तासांत आवळल्या मुसक्या.!

लोकन्याय मराठी प्रतिनिधी आशिष ढगे पाटील 

चाकण (पुणे) : ज्या हातांनी मैत्रीचे नाते जपायचे, त्याच हातांनी विश्वासाला तडा देत घरफोडी केल्याचा धक्कादायक प्रकार महाळुंगे येथे उघडकीस आला आहे. एका ओळखीच्या महिलेने बनावट चावीचा वापर करून घरातून तब्बल १३ लाख ८७ हजार रुपये किमतीचे १० तोळे सोने लांबवले होते. मात्र, दक्षिण महाळुंगे पोलीस ठाण्याच्या पोलिसांनी आपल्या तपासाचे चक्र वेगाने फिरवत अवघ्या २४ तासांत या घरफोडीचा छडा लावून १०० टक्के मुद्देमाल हस्तगत केला आहे.

नेमकी घटना काय?

​मिळालेल्या माहितीनुसार, दिनांक २२ एप्रिल २०२६ रोजी दिवसा घरफोडीचा हा प्रकार घडला होता. फिर्यादी यांच्या घरातून कपाटातील दागिने चोरीला गेल्याने महाळुंगे एमआयडीसी पोलीस ठाण्यात भारतीय न्याय संहितेच्या कलम ३३१ (१) आणि ३०५ (अ) अन्वये गुन्हा दाखल करण्यात आला होता.

सीसीटीव्ही फुटेज आणि तांत्रिक तपासाने दिला सुगावा..

​गुन्हा दाखल होताच वरिष्ठ पोलीस निरीक्षक विजय ढमाळ आणि त्यांच्या पथकाने तपासाला सुरुवात केली. घटनास्थळाच्या परिसरातील सीसीटीव्ही फुटेज तपासले असता, पोलिसांना एका महिलेच्या हालचाली संशयास्पद वाटल्या. तांत्रिक तपासाच्या आधारे पोलिसांनी तळेगाव दाभाडे येथील जिजामाता चौक परिसरात राहणाऱ्या सारिका संतोष भुजबळ (वय ३८) हिला ताब्यात घेतले. 

ओळखीचा गैरफायदा आणि बनावट चावी..

​महिला पोलिसांनी संशयित आरोपी सारिकाची कसून चौकशी केली असता, तिने गुन्ह्याची कबुली दिली. धक्कादायक बाब म्हणजे, आरोपी महिला ही फिर्यादीची परिचीत होती. फिर्यादीच्या घरी सोन्याचे दागिने कुठे ठेवले आहेत, याची तिला पूर्ण कल्पना होती. तिने संधी साधून बनावट चावी तयार केली आणि भरदिवसा घर उघडून दागिन्यांवर डल्ला मारला. 

पोलिसांची 'सुपरफास्ट' कामगिरी...

​पोलिसांनी आरोपी महिलेकडून चोरीला गेलेले १० तोळे वजनाचे सोन्याचे दागिने (किंमत १३,८७,०००/-) पूर्णपणे हस्तगत केले आहेत. अवघ्या २४ तासांत गुन्ह्याची उकल करत १०० टक्के मुद्देमाल मिळवल्याबद्दल महाळुंगे पोलिसांचे कौतुक होत आहे. 

यांच्या मार्गदर्शनाखाली झाली कारवाई:

ही कामगिरी पिंपरी चिंचवडचे पोलीस आयुक्त श्री. विनय कुमार चौबे, सह पोलीस आयुक्त डॉ. महावरकर, अप्पर पोलीस आयुक्त श्री. सारंग आव्हाड, श्री. बसवराज तेली, पोलीस उप आयुक्त श्रीमती श्वेता खेडकर, आणि सहायक पोलीस आयुक्त श्री. सचिन कदम यांच्या मार्गदर्शनाखाली करण्यात आली.  

या ​तपास पथकात वरिष्ठ पोलीस निरीक्षक विजय ढमाळ, पोलीस निरीक्षक (गुन्हे) अनिल देवडे, सपोनि भास्कर पुल्ली, पोउपनि भारत करे, महिला पोलीस अश्विनी महाडीक, वैष्णवी बालपांडे आणि इतर अंमलदारांचा समावेश होता. या गुन्ह्याचा पुढील तपास पोलीस हवालदार किशोर सांगळे करत आहेत.